ازاى تساعد غرة

كلنا بنتفرج على غزة، ومش عجبنا إلي بيحصل وبنشوف مناظر الشهداء و بنعيات و منعرفش ننام بالليل من كتر ما ضميرنا وجعنا اننا مش عارفين نعملهم حاجة... لكن ممكن نحاول نعمل حاجة بجد؟

أنا حاولت في التدوينة ده أقول الناس ممكن تعمل إيه.. أكيد كل واحد فينا ممكن يعمل حاجة.. حاولت أفكر و أحط البدائل اللي ممكن تنسب أي حد.. يا ريت الناس تبعتلي أي حاجة يشوفها مهمة ازوده على ديه
١. الحرب الإعلامية على الانترنت:

الحرب الإعلامية على الانترنت أصبحت موضوع الساعة.. سواءة على مواقع التدوين المصغر (ميكرو بلوجنج
micro blogging) زيتويتر و جايكو، أو على الفيسبوك إلي ابتدى يكون متحيز للصهاينة، أو على المدونات الخاصة بالناس.. والموضوع ده عمال بيكبر و قلب حرب فعلياً كل طرف بيحاول إنه يستخدم أحسن الطرق للوصول للناس و تغيير الرأي العام في مختلف الدول إلي تقدر تعمل ضغط على حكومتها. أحسن المواضيع إلي بتتكلم فالموضوع ده حتلاقيها عند بنت مصرية و محمد بشير

عموماً حبة نصايح في السريع:

إستعمل ping.fm لما تجي ترسل أخبار علشان يرسلها مرة وحدة على كل مواقع ال-
micro blogging .

غير صورتك في كل المواقع لصورة تعبر عن غزة و فلسطين.

غير اسمك في الفيسبوك و حط كلمة قبل اسمك gaza .

لو انت على جايكو تابع قناة غزة ولو على تويتر تابع اخبار غزة من الجزيرة

إنشر الأخبار في كل مكان.

أدخل في جدل مع إلي بيدافعو عن إسرائيل على مواقعهم و مدوناتهم و طلع عينيهم.

حط عداد الشهداء فى موقعك أو مدونتك.

حط تطبيق الفيسبوك ده فى حسابك


٢. الحرب الإلكترونية:

الحرب ديه شغالة على مستوى عالي جداً من الطرفين.. تخريب مواقع و اسكات أصوات إعلامية مؤثرة زي موقع القسام و المركز الإعلامي لحماس.. و من الناحية التانية يديعوت احرونوت و مواقع تانية كتير.. إلي يقدر يخش في الموضوع سواء بالهجوم أو بالدفاع يتفضل.. أبل متسألوني أنا معنديش إتصالات فالموضوع ده لحد دلوقتي.


٣. إظهر تعاطفك:

كلنا بنغير صورنا في الفيسبوك و كدة... لكن حول تنقل الموضوع ده للحياه الحقيقية .. أنا ديماً لابس الكوفية الفلسطينية .. معلق علم فلسطين في السيارة بتاعتي.. دايماً بكلم الناس عن الموضوع و بهدوء بحاول أغير رأي الناس إلي مش مهتمة علشان يفهموا. مش حنفضل طول عمرنا اونلاين بس.
٤. ادعمهم:

دعم معنوي أو دعم مادي.. 5 طرق أنا لقيتهم لحد دلوقتي:

إتصل بهم بالتليفون: في تلات مفاتيح هم: ٠٠٩٧٢٨٢٨٢ - ٠٠٩٧٢٨٢٨٤ - ٠٠٩٧٢٨٢٥٥.. بعد ما تكتب مفتاح منهم ضيف اي اربعة ارقام عشوائية.. (مثلا ٠٠٩٧٢٨٢٨٢١٢٣٤) واتكلم.. الناس هناك مش شيف الفضائيات.. مش شيف إن احنا معاهم.. مش عارفين إيه إلي بيجرى.. مش شايفين المظاهرات إلي بتحصل.. إتصل بهم و قولهم إن احنا معاهم.. قولهم إن احنا مش مسؤلين عن مواقف حكوماتنا بتعملها .. والله العظيم بتفرق معاهم.

زور الجرحى: موجودين في القاهرة في معهد ناصر و أكيد في مستشفيات تانية.. تخيل واحد أصيب و أغمى عليه بيفوق في بلد تانية و يلاقي رجله مقطوعة مثلاً.. أكيد وجودك حيفرق معاه كتير.

اتبرع بالدم: في حملات تبرع بالدم علشانهم في مصر.. روح واتبرع

اتبرع بالفلوس: فيه مليون واحد بيلم تبرعات.. إتبرعلهم أو لم معاهم من أصحابك والناس إلي معك في الشغل أو قرايبك او أي حد.. بس خلي بالك مفيش داعي انك تلبس قضية جمع تبرعات بدون تصريح.

اتبرع برصيد من موبايلك: حول رصيد على نمرة من الموجودين هنا و هما حيظبتو الموضوع...
٥. قاطع:

معلش أنا عرف الموضوع ده اتكلمنا فيه مليون مرة.. و عرف إن ناس كتيرة مش مقتنعة به.. معلش حتى لو مش مقتنع اعملها الكام يوم دول.. و لو مقتنع و مكسل يا ريت يكون إلي حصل سخنك انك تاخد رد فعل.
6. ادعيلهم:

ديه مش اخر واحده مش لقلة أهميتها.. لكن لكتر الكلام عنها وهى لوحدها ماتنفعش.. ادعى وصلى واعمل اللى تقدر عليه وكله فى ايد ربنا... وهو اللى يرحمنا برحمته